Biskup Íslands

Hinn almenni bænadagur verður haldinn sunnudaginn 5. maí. Í bréfi sem Agnes M. Sigurðardóttir, biskup Íslands, hefur sent til presta biður hún þá að biðja fyrir farsæld þjóðarinnar og því að þjóðinni farnist vel á öllum sviðum lífsins og nýjum stjórnvöldum auðnist að stjórna landinu af sanngirni og heiðarleika. Hún minnir einnig á að farsæld þjóðar felst í öryggi á öllum sviðum lífsins, einnig því trúarlega.   Í bréfinu segir:

Bænirnar í handbókinni minna okkur á að biðja fyrir ýmsum hópum en þó eru ekki nefnd sérstaklega þau sem hafa mátt þola einelti og ofbeldi hvers konar. Það má lyfta því fram því það er alvarlegt samfélagsmein. Fátækt er líka staðreynd. Það eru hópar fólks, sem betur fer ekki stórir, sem búa við veraldlegan skort og börn fá ekki nógan mat nema í skóla eða leikskóla. Þess varð ég áskynja í vísitasíu minni undanfarna daga.   Málefni hælisleitenda eru líka mál sem er vandamál heimsins og við Íslendingar verðum að taka þátt í því að finna færar leiðir til betra lífs fyrir fólk sem hingað leitar í neyð sinni. Farsæld þjóðar felst í öryggi á öllum sviðum lífsins, einnig trúarlega.   Kirkjan okkar hefur það hlutverk að vera leiðandi í samstarfi kristinna trúfélaga og trúarbragða. Hún þjónar öllum er til hennar leita og starfar um land allt. Hlutverk hennar er að stuðla að farsælla lífi þeirra sem hér búa með því að ganga fram í nafni Jesú Krists og feta í sporin hans. Hann talaði og hann framkvæmdi.   Gangið á hans vegum. Guð blessi ykkur í lífi og starfi.

Biskupsvisitasía í Kjalarnessprófastsdæmi stendur nú sem hæst. Biskup hefur lokið heimsóknum á Suðurnes og Hafnarfjörð, en mun heimsækja Grindavík í júní. Í dag lauk Agnes biskup fjölbreyttri dagskrá í Mosfellsbæ þar sem hún heimsótti meðal annars Skálatún, Eirhamra, skólastofnanir og kynnti sér einnig fornleifauppgröft á Hrísbrú.   Vel var mætt í hátíðarguðsþjónustu í Lágafellskirkju og kirkjukaffi í Hlégörðum á sunnudaginn, þrátt fyrir að margir hefðu vakað langt frameftir á kosninganótt. Vísitasían heldur áfram síðari hlut maí mánaðar og fram í júní en næst er förinni heitið í Garðabæ og á Álftanes.

Séra Tímur Zolotuskiy, Frú Agnes M. Sigurðardóttir og Herra Pétur Bürcher, varðandi brottnám kristinna manna í Sýrlandi.

Við ásamt kirkjuleiðtogum um heim allan lýsum yfir hluttekningu okkar vegna örlaga svo margra manna, einkum þeirra tveggja biskupa sem voru numdir á brott, hins sýrlensk-orþodoxa biskups Yohanna Ibrahim og grísk-orþodoxa biskups Bulos Yazigi. Grípa verður til aðgerða sem fyrst til að frelsa þá úr höndum mannræningjanna.

Jafnframt hvetjum við íslensk stjórnvöld og alþjóðasamfélagið til að þrýsta á stríðandi aðila í Sýrlandi til að virða og vernda réttindi allra minnihlutatrúarhópa, sama hverjir þeir eru. Megi réttlæti og friður sigra!

Séra Tímur Zolotuskiy, fyrir hönd Rússnesku rétttrúnaðarkirkjunnar

Biskup Agnes M. Sigurðardóttir, fyrir hönd Þjóðkirkjunnar

Biskup Pétur Bürcher, fyrir hönd Kaþólsku kirkjunnar á Íslandi

Yfirlýsingin var send fjölmiðlum og utanríkisráðherra.

Frétt um brottnámið má nálgast hér.

Biskup Íslands vísiteraði Víðistaðaprestakall 24. apríl. Í vísitasíunni fundaði hún með sóknarpresti og sóknarnefnd.

Biskup Íslands vísiteraði Tjarnaprestakall 22. og 23. apríl. Hún heimsótti meðal annars Áslands- og Hraunvallaskóla og snæddi hádegisverð með starfsfólki og sóknarnefnd. Við það tækifæri var afhenti Hafnarfjarðarbær formlega lóð undir kirkjubyggingu. Hún heimsótti einnig Stóru-Vogaskóla og tók þátt í helgistund með eldri borgurum í Álfagerði. Þá heimsótti hún bæjarskrifstofur sveitarfélagsins Voga. Lesa áfram …

Agnes M. Sigurðardóttir biskup Íslands vísiteraði Hafnarfjarðarprestakall 19. og 21. apríl. Vísitasían hófst með helgistund í Hafnarfjarðarkirkju og svo heimsótti biskup og föruneyti hennar meðal annars Karmelklaustrið, Hafnarborg, bæjarstjóra og skrifstofur bæjarstjórnar, leikskólann Hörðuvöllum. Hún tók einnig þátt í messu í Hafnarfjarðarkirkju og fundaði með presti og sóknarnefnd. Lesa áfram …

Agnes M. Sigurðardóttir, biskup Íslands, greindi frá því við slit prestastefnu í dag að ákveðið hefði verið að safna fyrir línuhraðli á Landspítalanum. Agnes biskup hvetur presta, djákna, sóknarnefndarfólk og starfsfólk kirkjunnar til að setja söfnunina á dagskrá í hverjum söfnuði kirkjunnar. Lesa áfram …

Í tilefni af viðtali við Guðnýju Jónu Kristjánsdóttur í Kastljósi í gærkvöldi og viðtali við Sighvat Karlsson sóknarprest á Húsavík í Fréttablaðinu í dag er mikilvægt að koma eftirfarandi á framfæri.

Nauðgun er ofbeldi og ofbeldi á aldrei að líðast. Kirkjan og prestarnir sem lykilstarfsmenn hennar eiga að standa með þolendum og styðja þá í að leita réttar síns. Lesa áfram …

Í vísitasíunni sem nú stendur yfir, hefur Agnes biskup heimsótt söfnuði, kirkjur, safnaðarheimili sem og fyrirtæki og stofnanir á Suðurnesjum. Í upphafi vikunnar fengu Agnes og föruneyti hennar tækifæri til að kynnast nánar starfsemi nokkurra stofnanna sem sinna velferð og almannaþjónustu í Keflavík. Lesa áfram …

Agnes M. Sigurðardóttir, biskup Íslands, vísiteraði Njarðvíkurprestakall föstudaginn 5. apríl. Biskup heimsótti meðal annars Njarðvíkurskóla, Samkaup og leikskólann Holt. Hún fundaði jafnframt með sóknarnefndum í prestakallinu og snæddi kvöldverð með sóknarnefndarfólki, starfsfólki og kórfólki. Lesa áfram …